Wat was et een mooie aovend daor bie’j de Taalwerkplaatse in de veurmalige rioolwaterzuvering in et Nieuw Amsterdamse bos. Et zol een Dreumschrieversbeuntie wean. Ie wet wel met gedichjes, leedjes en verhaal’n. Ik had ezeene dat Jan Veenstra ok zol kommen vertellen en den hadde wie-j al es eheurd op een speciale dag van de Taol in de Bibliotheek van Emmen. Dus wie-j der hen. Wim mos ik nog wel efkes opwarmen der veur, maor dan wol zich wel opofferen.
Och wat een mooie Drentse gedichjes van Gerdina en ok Marchinus Elting, mooie Drentse versjes van Janke Lameris, zo gevulig ok en ze hadden ok alles nog zelf eschreven. Toen Janke het leedjen had ezong’n van D’r löp een draod van jou naor mij, aover de band met heur va, vonne wie-j allebeide dat et allermooiste. Wim koch metene maor een cd van heur zoda-w mergenvrog op weg naor Apeldoorn daor alvaste naor luustern könt. Jao, d’r zit nog wel verschil tussen Drents, Twents en Achterhooks, maor dat moch de pret neet drukk’n. Wat maakt et ok uut of iej noe iets in de buse hebt of tesse of in ’n tuk. Wie-j zaten näöst een stel uut Valthe, maor eigenlijk opegreuid in Valthermond. Ze praot daor weer een betjen anders, et Veenkoloniaals. En ie könt et geleuven of neet, maor dee kenn’n Glenn en Gretha ok weer, kleine wereld toch. Wie-j hebt al een afspraokjen staon veur januari as dee Henk Pras, want zo heit e, ok ergens geet vertell’n in Valthermond.
Ie zit meschien te wachten töt ik aover Jan Veenstra beginne. Now.. ik kan oe zegg’n dat e helemaol op dreef was met zien vertellen aover zien jeugd in Noordsche Schut, waor hee opgreujen. En ik kon et neet laoten… ik mosse gewoon een buuksken van em kopen. Ik nom den waor zien verhaal dat e vertell’n ok in steet: Die nacht een feest. ’t Is een biezunder beuksken ewodden want hee hef zien handteikening d’r in ezet. A-j zin hebt mag ie em straks ok wel efkes leazen.
[i]A very nice evening with poems, songs and stories in the Drentse Country language [/i]