Opa Eggink was biej ons altied opa uut Barchem. Opa Bieënhof was gewoon ‘onze opa’. Dee wonen biej ons, eerst op de Haar en later gingen opoe en opa met naor de Boomgaard Zo geet dat aj d’r meer hebt. Zo hadden wiej opoe uut Mossel, ok een opoe Eggink, de mooder van vader Hein, een leef mense. Dee zol op de Prinsenhoeve in Mossel ok wel ‘onze opoe’ emuumd wean. Zo was dat vrogger toen d’r nog gien bejaardenhuzen waarn. Veur de kinder was et een uutkomst want d’r was d’r altied ene in huus a’j uut schole kwamen.
Opa Eggink was dan wel boer, mor ok uutvinder, electricien èn schriever. Heel wat breeven bunt d’r uut zien hande aover Nederland egaon. Dominees, pastoors en politici waren vake zien gesprekspartners. Soms werden et vrienden. Zo hef ds Buskes em nog es opezocht en zat biej um op zien canapeetjen in et kökkentje op de Boskamp en schreef d’r een stuksken aover in een boek.
En zo zag dat ‘r op de Boskamp uut. As opa niet op zien canapeetjen zat te schrieven of an de keukentaofel, dan zat e met mooi weer buten. Jan en Jantjen hadden zelf wel gien kinder mor ik denke dat, veural zommers, der altied wel kinder aover de vloere waren. As vleegen op de stroop kwamen ze op ome Jan en tante Jantjen af.
