Tweede poging
En as ik hier met mien Storm biej et bos tussen de beume deurkieke mot ik alweer an onze ome Gijs denken. ’t Is al wat later in de tied. Hee was noe al een paar jaor jachtopziener af en wonen noe an de rand van de Veluwe en de Onzalige bossen. Hee was gek op alles in de natuur en had een stel kippen biej huus rondscharrelen dee ’s nachts in de boom zatten. Puur natuur zo-j toch zeggen.
Maor op een nacht wodden ze inens wakker van zien kippen dee tekeer gingen. Hee d’r uut en gauw naor buten op et gekakel af. Daor zag e nog net Reintje de vos met een van zien kippen d’r vandeur gaon richting bos. Gijs gunnen Reintje van alles maor neet zien kippen. Hee klappen metene flink in de hande en waorempel Reintje leet de kippe lös en ging d’r vandeur. Gijs pakken em op en zag dat d’r nog laeven in zat. ’t Kipken wodden verzörgd met wat extra voer en water met een asperientjen d’r in opelöst. De kippe hef et ered. Toch ging Gijs metene maor een höksken timmeren veur zien kipkes want Reintje wus noe de weg.